Odlar Yurdu Universitetində məzunların buraxılış mərasimi keçirilmişdir

Odlar Yurdu Universitetində və Odlar Yurdu Kollecində 2025-ci ilin məzunları üçün təntənəli buraxılış mərasimi təşkil olunmuşdur. Tədbir Azərbaycan Respublikasının Dövlət Himninin səsləndirilməsi ilə başlanmış, himn universitet və kollec tələbələrinin ifasında səsləndirilmişdir. Bu anlar tədbirə xüsusi təntənə və emosional ovqat bəxş etmişdir.

Rəsmi hissədə Odlar Yurdu Universitetinin rektoru, professor Əhməd Vəliyev çıxış edərək məzunları təbrik etmiş, onların təhsil dövründə göstərdikləri əzmkarlıq və səylərin təqdirəlayiq olduğunu bildirmişdir. Cənab rektor qeyd etmişdir ki, universiteti bitirmiş hər bir gənc müasir biliklərlə yanaşı, milli dəyərlərə və vətəndaş məsuliyyətinə də sahib olaraq cəmiyyətə qədəm qoymuşdur. O, məzunlara gələcək fəaliyyətlərində uğurlar arzulamış, onları daim yeniliklərə açıq olmağa və elmi biliklərə sadiq qalmağa çağırmışdır.

Tədbirdə həmçinin Odlar Yurdu Universitetinin İdarəetmə Şurasının sədri, Milli Məclisin deputatı, professor Samir Vəliyev çıxış etmişdir. O, məzunların bu əlamətdar gününü həyatlarının yeni mərhələsinin başlanğıcı kimi qiymətləndirmişdir. Bildirmişdir ki, Odlar Yurdu Universiteti və Kolleci təkcə peşəkar bilik və bacarıqlar verməklə kifayətlənmir, gənclərdə liderlik, analitik düşüncə və vətənə xidmət hisslərini də formalaşdırmışdır. Professor Samir Vəliyev məzunlara möhkəm iradə, ardıcıl əmək və böyük uğurlar arzulamışdır.

Tədbir zamanı təhsilini uğurla başa vurmuş, ictimai fəaliyyəti ilə fərqlənmiş məzunlara fəxri fərmanlar təqdim olunmuşdur. Bu mükafatlar gənclərin həm akademik, həm də sosial sahədə qazandıqları nailiyyətlərin göstəricisi kimi dəyərləndirilmişdir. Məzunlar bu təltifləri illər boyu çəkilən zəhmətin bəhrəsi kimi qəbul etmiş, onları gələcək uğurlara stimul hesab etmişlər.

Tədbirin bədii hissəsi universitet və kollec tələbələrinin iştirakı ilə hazırlanmış konsert proqramı ilə davam etmişdir. Səsləndirilmiş musiqi nömrələri və səhnələşdirilmiş çıxışlar tədbirə bayram ab-havası bəxş etmişdir. Konsert proqramı tələbələrin yaradıcılıq qabiliyyətini nümayiş etdirməklə yanaşı, onların universitet həyatına olan bağlılığını da əks etdirmişdir.

Tədbir xatirə şəkillərinin çəkilməsi və səmimi görüşlərlə yekunlaşmış, məzunlar üçün unudulmaz və mənalı bir gün kimi yadda qalmışdır.