Odlar Yurdu Universitetində tələbələrin təcrübəyə hazırlıq görüşü keçirildi

Odlar Yurdu Universitetində tələbələrlə istehsalat, pedaqoji və diplomqabağı təcrübəyə hazırlıqla bağlı görüş keçirilib.

Odlar Yurdu Universitetində tələbələrin istehsalat, pedaqoji və diplomqabağı təcrübəyə hazırlığı ilə bağlı görüş təşkil olunub. Görüşün əsas məqsədi tələbələrin təcrübə mərhələsinə sistemli və məsuliyyətli şəkildə hazırlanması, onların hüquq və vəzifələri barədə ətraflı məlumatlandırılması olub.

Tədbirdə Humanitar, təhsil və dillər fakültəsinin dekanı, dosent Nuridə Muxtarzadə və Strateji inkişaf və karyera departamentinin rəhbəri Aslan Əzimzadə iştirak ediblər.

Çıxışlar zamanı bildirilib ki, istehsalat, pedaqoji və diplomqabağı təcrübə tələbələrin nəzəri biliklərinin praktik mühitdə tətbiqi, peşə bacarıqlarının formalaşdırılması və əmək bazarına daha hazırlıqlı inteqrasiyası baxımından mühüm əhəmiyyət daşıyır. Qeyd olunub ki, təcrübə müddəti tələbələrin məsuliyyət, intizam, komandada işləmək və peşə etikası kimi kompetensiyalarının inkişafında xüsusi rol oynayır.

Eyni zamanda vurğulanıb ki, diplomqabağı təcrübə tələbələrin gələcək buraxılış işlərinin mövzusunun praktik müstəvidə əsaslandırılmasına və elmi-tədqiqat bacarıqlarının inkişafına töhfə verir. Pedaqoji təcrübə isə xüsusilə təhsil istiqamətində təhsil alan tələbələr üçün real dərs mühitində metodiki bacarıqların formalaşdırılmasına şərait yaradır.

Strateji inkişaf və karyera departamenti tərəfindən bildirilib ki, universitet tələbələrin təcrübə yerlərinin seçimi və koordinasiyası prosesinə xüsusi diqqət yetirir və bu istiqamətdə tərəfdaş təşkilatlarla əməkdaşlıq genişləndirilir. Görüş interaktiv müzakirə formatında davam edib, tələbələrin sualları cavablandırılıb və onlara təcrübə mərhələsinin uğurla başa vurulması üçün zəruri tövsiyələr verilib.

Odlar Yurdu Universiteti tələbələrin praktik hazırlığının gücləndirilməsini, onların peşəkar və şəxsi inkişafını daim prioritet istiqamət kimi müəyyənləşdirir və bu sahədə sistemli fəaliyyətini davam etdirir.