Odlar Yurdu Universitetində əcnəbi tələbələrimiz üçün seminar keçirilmişdir
15 Mart, 2024
Odlar Yurdu Universitetində “Avrasiya Miqrasiya Təşəbbüsləri Platforması” İctimai Birliyinin təşəbbüsü və Dövlət Miqrasiya Xidmətinin birgə təşkilatçılığı ilə təhsil alan əcnəbi tələbələrimiz üçün seminar keçirilmişdir. “Miqrasiya sahəsində elektron resurslardan istifadə və bəyan olunmuş təhsilalma məqsədlərinin pozulmasına görə inzibati məsuliyyət” mövzusunda keçirilən seminarın məqsədi Odlar Yurdu Universitetində təhsil alan əcnəbi tələbələrin və müəssisənin aidiyyəti məsələlərə məsul şəxslərinin miqrasiya qaydaları sahəsində biliklərinin artırılması və bu istiqamətdə əcnəbi tələbələrlə əlaqədar sənədləşmə işlərinin aparılma bacarıqlarının inkişaf etdirilməsi olmuşdur.
Giriş sözü ilə çıxış edən Odlar Yurdu Universitetinin keyfiyyət təminatı, innovasiyalar və beynəlxalq əlaqələr üzrə prorektoru, prof. Fəxrəddin Məmmədov əcnəbi tələbələrin təhsilalma məqsədlərindən irəli gələn qeydiyyat və miqrasiya qaydalarına uyğun davranışı, bu müstəvidə daha çox rast gəlinən aktual məsələlər barədə danışmışdır.
Çıxış edən “Avrasiya Miqrasiya Təşəbbüsləri Platforması” İctimai Birliyinin sədri, s.f.f.d. Azər Allahverənov həm birliyə, həm də təsisçisi olduğu Miqrasiya Əməkdaşlıq Platformasına əcnəbi tələbələrlə bağlı daxil olan çoxsaylı müraciətlərdən bəhs etmiş və təhsil alan əcnəbilər arasında keçirilən bu kimi maarifləndirmə tədbirlərinin əhəmiyyətindən danışmışdır. Bildirilmişdir ki, Odlar Yurdu Universitetində keçirilən tədbir 19 mart – Azərbaycan Respublikasının Mqirasiya orqanları işçilərinin peşə bayramı münasibətilə Dövlət Miqrasiya Xidməti tərəfindən təşkil olunan maarifləndirmə tədbirləri çərçivəsində keçirilmişdir. Bu səbəbdən seminarın gedişatı zamanı DMX-nın 17 illik fəaliyyətinə həsr olunan video-çarx nümayiş olunmuşdur.
Tədbirdə geniş nitqlə çıxış edən və DMX-nin çoxşaxəli fəaliyyətinə nəzər salan Miqrasiya siyasəti və hüquqi təminat baş idarəsinin Hüquqi təminat idarəsinin rəis müavini Xəyalə Abbasova DMX tərəfindən əcnəbi tələbələrlə bağlı mövcud miqrasiya qaydaları və bu kateqoriyadan olan əcnəbilərin yol verdikləri hüquqpozmalar barədə danışmışdır.
DMX-nin Miqrasiya proseslərinin təhlili və informasiya təminatı baş idarəsinin Miqrasiya proseslərinin təhlili idarəsinin rəis müavini vəzifəsini müvəqqəti icra edən Sunay Quliyev və Miqrasiya nəzarəti baş idarəsinin ölkə daxilində miqrasiya məsələlərinə baxılması şöbəsinin rəisi Rüstəm Rəhimov təhsil alan əcnəbi tələbələrlə bağlı miqrasiya qanunvericiliyinin müxtəlif aspektlərini və elektron resurslardan istifadə qaydalarını əhatə edən təqdimatlarla çıxış etmişlər.
Görüşdə iştirak edən Odlar Yurdu Universitetinin ümumi işlər üzrə prorektoru Taleh Qələndərli və “Miqrasiya Sahəsinin İnkişafı” İctimai Birliyinin sədri, Miqrasiya Əməkdaşlıq Platformasının Təhsil üzrə İşçi qrupunun rəhbəri Vidadi Fətullayev əcnəbi tələbələrlə bu kimi maarifləndirici tədbirlərin keçirilməsinin əhəmiyyətini qeyd etmişlər və görüşün keçirilməsinə təşəbbüs göstərən və dəstək olan bütün tərəfdaşlara dərin təşəkkürlərini bildirmişlər.
Tədbirdə əcnəbi tələbələrin və Odlar Yurdu Universitetinin əcnəbi tələbələrlə iş üzrə məsul əməkdaşlarının sualları Dövlət Miqrasiya Xidmətinin nümayəndələri tərəfindən ətraflı cavablandırılmış, miqrasiya qanunvericiliyinin əcnəbi tələbələrlə bağlı müddəalarına dair geniş izahatlar verilmişdir.
