Odlar Yurdu Universitetində "Xəyallar Adası" kitabının təqdimat mərasimi keçirilmişdir
09 Oktyabr, 2024
Odlar Yurdu Universitetinin Təbiət və texnologiya fakültəsinin Biologiya ixtisası üzrə 3-cü kurs tələbəsi Həsən Qurbanlının "Xəyallar Adası" adlı kitabının təqdimat mərasimi böyük maraqla keçirilmişdir.
Tədbirin açılışını edən universitetin Tələbə Elmi Cəmiyyətinin (TEC) sədri Azəri Türkan, gənc yazar Həsən Qurbanlının iki illik TEC fəaliyyətindən danışaraq, onun bu müddətdə əldə etdiyi uğurları vurğulamışdır. O, Həsənin yaradıcılığında yeni bir mərhələ kimi bu kitabın xüsusi əhəmiyyətini qeyd etmişdir.
Odlar Yurdu Universitetinin professor-müəllim heyəti və tələbələri də Həsən Qurbanlının "Xəyallar Adası" kitabının təqdimatında fəal iştirak etmişlər. Onlar kitab haqqında öz dəyərli fikirlərini bölüşmüş, gənc müəllifin yaradıcılığını təqdir etmiş və əsərin gənc yazarlara ilham verici olduğunu vurğulamışlar. İştirakçılar, həmçinin, kitabın mövzusu və üslubu barədə müzakirələr apararaq, Həsənin yaratdığı dünyaya dair öz düşüncələrini paylaşmışlar.
Tədbir zamanı tələbələr "Xəyallar Adası" kitabından seçilmiş şeirləri səsləndirmiş və bu çıxışlar təqdimatın məzmununu daha da zənginləşdirmişdir. Bu çıxışlar dinləyicilərə kitabın dəyəri və məzmunu haqqında daha geniş təsəvvür yaratmışdır. Həsən Qurbanlının özünəməxsus üslubu və duyğusal dərinliyi iştirakçılara güclü təsir bağışlamışdır.
Bu təqdimat mərasimi yalnız bir kitabın tanıdılması deyil, eyni zamanda gənc ədiblərin yaradıcılığına dəstək vermək, ədəbiyyat mühitini canlandırmaq məqsədini daşıyırdı.
Professor-müəllim heyəti və tələbələr Həsən Qurbanlıya gələcək layihələrində uğurlar arzulayaraq, ona daha da irəliləməsi üçün motivasiya və dəstək göstərmişlər.
Təqdimat mərasimi xatirə şəkli çəkilməsi ilə yekunlaşmışdır.
