OYU-da Yeni Azərbaycan Partiyasının 32 illiyinə həsr olunmuş tədbir keçirilmişdir
21 Noyabr, 2024
Odlar Yurdu Universitetində Yeni Azərbaycan Partiyasının təsis edilməsinin 32 illiyinə həsr olunmuş tədbir keçirilmişdir. Tədbir, Azərbaycan xalqının Ümummilli Lideri Heydər Əliyevin büstü önünə gül qoyulması ilə başlamış və dövlət himninin səsləndirilməsi ilə davam etmişdir. Daha sonra Vətən müharibəsi şəhidlərinin xatirəsi bir dəqiqəlik sükutla yad edilmişdir.
Tədbirdə giriş sözü ilə çıxış edən Milli Məclisin deputatı, millət vəkili, professor Samir Vəliyev bildirmişdir ki, Cənubi Qafqazın ən böyük siyasi qüvvəsi olan Yeni Azərbaycan Partiyası (YAP) cəmiyyətin bütün təbəqələrini ətrafında sıx birləşdirən ümumxalq partiyasıdır. O, Ümummilli Lider Heydər Əliyevin qurucusu olduğu YAP-ın zaman keçdikcə ümummilli partiyaya çevrildiyini və bu gün ölkə daxilində və beynəlxalq aləmdə güclü söz sahibinə çevrildiyini vurğulamışdır.
Daha sonra Yeni Azərbaycan Partiyasının yaradılmasının 32 illiyinə həsr olunmuş video-çarx tədbir iştirakçılarına təqdim olunmuşdur.
Sonra Odlar Yurdu Universitetinin İqtisadiyyat və iqtisadi münasibətlər kafedrasının müdiri, professor Elşad Məmmədov çıxış edərək Yeni Azərbaycan Partiyasının iqtisadi siyasət sahəsindəki nailiyyətlərinə toxunmuş, partiyanın ölkəmizin iqtisadi inkişafında mühüm rol oynadığını qeyd etmişdir. Professor Elşad Məmmədov, Azərbaycanın iqtisadi uğurlarının YAP-ın strateji yanaşmalarının nəticəsi olduğunu vurğulamışdır.
Daha sonra həmin kafedranın müəllimi Nigar Kərimova çıxış etmişdir və Yeni Azərbaycan Partiyasının gənclər və təhsil sahəsində həyata keçirdiyi layihələrin əhəmiyyətini ifadə etmiş, təhsil islahatlarının cəmiyyətin inkişafındakı rolunu vurğulamışdır.
Tədbirdə çıxış edən Odlar Yurdu Universitetinin Dizayn kafedrasının müəllimi Leyla Heydərova isə partiyanın mədəniyyət və incəsənət sahəsinə verdiyi dəstəyi diqqətə çatdırmış və bu sahədə əldə olunan uğurlar haqqında fikirlərini bölüşmüşdür.
Tədbirin sonunda Yeni Azərbaycan Partiyasının könüllüsü, eyni zamanda Odlar Yurdu Universitetinin tələbəsi olan Ayna Məmmədova çıxış etmiş, partiyanın gənc nəslin inkişafına və onların cəmiyyət həyatında fəal iştirakına verdiyi xüsusi diqqəti vurğulamışdır. O, gənclərin bu partiyada iştirakının önəmini qeyd edərək, onların siyasi və sosial həyatda daha aktiv rol oynamalarını əhəmiyyətlə bildirmişdir.
Tədbirin bədii hissəsində Odlar Yurdu Universitetinin əməkdaşı Səftər Ağayevin ifasında Yeni Azərbaycan Partiyasına həsr olunmuş mahnı təqdim olunmuşdur. Mahnı iştirakçılarda dərin təəssürat yaratmış və tədbirin bədii hissəsini uğurla tamamlamışdır.
Odlar Yurdu Universitetində keçirilmiş bu tədbir Yeni Azərbaycan Partiyasının 32 illik fəaliyyəti və bu illər ərzində qazandığı nailiyyətlərin əks olunduğu bir əhəmiyyətli an olaraq yaddaşlarda qalmışdır.
