Odlar Yurdu Universitetində Beynəlxalq Avrasiya ölkələri iqtisadiyyatları konfransı keçirilib

Dünyanın müxtəlif ölkələrindən nüfuzlu alim və mütəxəssisləri bir araya gətirən Beynəlxalq Avrasiya Ölkələri İqtisadiyyatları Konfransı bu il 12-ci dəfə təşkil olunaraq 2-4 sentyabr 2020-ci il tarixlərində Odlar Yurdu Universitetində keçirilib.

Türkdilli dövlətlər arasında elmi və iqtisadi əməkdaşlığın möhkəmləndirilməsi, qlobal iqtisadi trendlərin araşdırılması və müasir tədqiqatların təqdim olunması məqsədilə təşkil edilən bu nüfuzlu tədbir COVID-19 pandemiyası səbəbindən onlayn formatda baş tutub. Konfrans çərçivəsində qloballaşma, beynəlxalq ticarət, davamlı inkişaf, maliyyə, enerji, ekologiya və digər mühüm mövzularda müzakirələr aparılıb, müxtəlif ölkələrdən 50-dən çox alim elmi məruzələrlə çıxış edib.

Konfransın açılışında Odlar Yurdu Universitetinin rektoru, professor Əhməd Vəliyev çıxış edərək, belə mötəbər tədbirlərin yeni elmi yanaşmaların və müasir metodologiyaların tətbiqi baxımından böyük əhəmiyyət kəsb etdiyini vurğulayıb. O, Azərbaycanın Cənubi Qafqazda strateji mövqeyini, iqtisadi və elmi potensialını diqqətə çatdıraraq, ölkəmizin regionun aparıcı dövləti kimi beynəlxalq əməkdaşlıqda mühüm rol oynadığını qeyd edib.

Konfrans çərçivəsində Türkiyənin Beykent Universitetinin rektoru professor Murad Fərman, Doğuş Universitetinin rektoru professor Turgut Özkan, Qırğızıstanın Manas Universitetinin rektoru Səbahettin Balcı və digər tanınmış alimlər çıxış edərək, türk dünyası ölkələri arasında elmi və iqtisadi əlaqələrin inkişafından, dünya iqtisadiyyatında baş verən çağırışlardan bəhs ediblər.

Odlar Yurdu Universitetinin tədris işləri üzrə prorektoru Qabil Qafarov bildirib ki, konfransda təqdim olunan elmi məqalələr beynəlxalq indeksli jurnallarda dərc edilərək dünya elmi ictimaiyyətinin diqqətinə çatdırılacaq.

Tədbirin ilk günündə Azərbaycanın müasir geosiyasi reallıqları və perspektivləri, regionda və dünyada baş verən mühüm ictimai-siyasi və iqtisadi proseslər geniş müzakirə olunub, iştirakçıların sualları cavablandırılıb.

Odlar Yurdu Universitetinin ev sahibliyi etdiyi bu beynəlxalq tədbir elm və iqtisadiyyat sahəsində əməkdaşlığın yeni perspektivlərini müəyyənləşdirərək, gələcək araşdırmalar üçün möhkəm bir zəmin yaradıb.