Əcnəbi tələbələrin valideynləri üçün "Açıq Qapı" günləri davam edir

Odlar Yurdu Universitetində xarici tələbələrin valideynləri üçün təşkil olunan “Açıq Qapı” günləri uğurla davam edir. Bu dəfə, Türkiyə vətəndaşı Ayberk Gürcan adlı kompüter mühəndisliyi ixtisası üzrə təhsil alan tələbənin valideynləri universitetlə əyani şəkildə tanış olublar.

Tədbirdə qonaqları qəbul edən universitetin Elmi İşlər üzrə Prorektoru, professor Tərlan Abdullayev, universitetin qapılarının hər zaman açıq olduğunu vurğulayıb. O, valideynlərin istənilən vaxt imtahan prosesini müşahidə edə biləcəklərini, həmçinin universitetdə keçirilən tədbir və iclaslarda iştirak edə biləcəyini bildirib. Prorektor, görüşün universitetin valideynlərlə daha sıx əməkdaşlıq etməsi baxımından yeni istiqamətlər və hədəflər açacağına ümid etdiyini də qeyd edib.

Tədbir zamanı professor Tərlan Abdullayev, Odlar Yurdu Universitetində həyata keçirilən layihələr və onların tələbələrin inkişafına verdiyi töhfələr barədə də məlumat verib. O, universitetin xarici tələbələrə olan yanaşmasının və onların təhsil həyatına olan töhfəsinin əhəmiyyətini qeyd edərək, valideynlərə universitetlə əməkdaşlıq etdiklərinə görə təşəkkür edib.

Universitetlə yaxından tanış olan valideynlər, təhsil müəssisəsinin müasir tədris və inkişaf imkanlarından məmnun qaldıqlarını bildirərək, bu təşəbbüsün faydalı olduğunu qeyd ediblər. “Açıq Qapı” günləri, valideynlərin universitetlə əlaqələrini gücləndirərək, tələbələrin təhsilinə daha da yaxın olmasına şərait yaradır.