Odlar Yurdu Universitetində 2022-2027-ci illər üçün Strateji İnkişaf Planının (SİP) hazırlanması çərçivəsində tələbələrin təklifləri dinlənilib

Universitetin Tələbə Elmi Cəmiyyəti (TEC) və Tələbə Gənclər Təşkilatı (TGT) üzvlərinin iştirakı ilə keçirilən görüşdə, tələbələr Strateji İnkişaf Planının formalaşdırılması prosesinə öz töhfələrini veriblər. SİP, Odlar Yurdu Universitetinin ümumi vizyonunu və prioritetlərini müəyyən edərək təhsilin və elmin inkişafına dair mühüm istiqamətləri müəyyənləşdirən bir sənəd olacaq. Həmçinin, bu plan universitetin təhsil və elmi fəaliyyətində yüksək keyfiyyət standartlarını qorumaqla yanaşı, rəqabət qabiliyyətini artırmağa və cəmiyyətin tələblərinə uyğunlaşmağa xidmət edəcək əsas yol xəritəsidir.

Tələbələrin təqdim etdiyi təkliflər arasında startap və inkubasiya mərkəzlərinin yaradılması, yaradıcılığın inkişafı məqsədilə müxtəlif müsabiqə, festival və hakatonların keçirilməsi, eləcə də xarici universitetlərlə yeni əlaqələrin qurulması kimi məsələlər önə çəkilmişdir. Bu təşəbbüslərin Strateji İnkişaf Planında nəzərə alınması tələbələrin inkişaf və innovasiya yönümlü fikirlərinin universitetin gələcək inkişafına müsbət təsir göstərəcəyinə dair inam yaradır.

Bu cür müzakirələr tələbələrin planın formalaşdırılmasında fəal iştirakını təmin edərək, universitetin inkişaf strategiyasına daha geniş perspektivlər qatmağa imkan verir.