Odlar Yurdu Universitetinin tələbəsindən maraqlı ixtira: Yuxuda sürməyi qarşısını alan eynək

Gecə saatlarında baş verən avtomobil qəzalarının bir çoxunun səbəbi sürücünün yolda yuxulamasıdır. Bu cür hadisələrin qarşısını almaq məqsədilə Odlar Yurdu Universitetinin Kompüter Mühəndisliyi ixtisası üzrə magistratura təhsilini alan tələbəsi Alim Babazadə və onun komandası tərəfindən hazırlanan yeni və yenilikçi bir ixtira diqqət çəkib.

Alim Babazadə və komandası, sürücülərin yuxu halında sükan arxasında olmasının qarşısını almaq üçün xüsusi bir eynək icad ediblər. Bu eynək sürücünün gözləri yumulduqda, hər 2 saniyədən bir xəbərdarlıq siqnalı verir, bu isə sürücüyə dərhal diqqətini cəmləməsi və yuxudan ayılması üçün xəbərdarlıq edir. Həmçinin, bu məlumat mobil telefonuna göndərilir və telefon siqnal verərək sürücünü tamamilə oyandırır.

Bu yaradıcı həll, bir çox avtomobil qəzalarının qarşısını almaq və yolda təhlükəsizliyi artırmaq məqsədi güdür. Odlar Yurdu Universitetinin tələbəsi Alim Babazadənin bu ixtirası yalnız təhsil sahəsində deyil, həm də cəmiyyətin təhlükəsizliyinin artırılması baxımından çox mühüm bir addımdır. O, elmi yeniliklərə və texnoloji inkişaflara olan marağı və həvəsi ilə həm universitetin, həm də ölkəmizin fəxri olmağa layiq bir gənc ixtiraçıdır. Bu cür ideyaların reallaşdırılması, həmçinin gələcəkdə daha çox gəncin innovasiya sahəsində çalışmağa təşviq edilməsi üçün böyük əhəmiyyət kəsb edir.