Odlar Yurdu Universitetinin Peşəkar inkişaf klubunun (PİK) növbəti qonağı: Fəxri Ağayev

Odlar Yurdu Universitetinin Peşəkar İnkişaf Klubu (PİK) növbəti tədbirini tanınmış biznes konsultant və peşəkar təlimçi Fəxri Ağayevin iştirakı ilə keçirib. "Karyera və Peşəkar İnkişaf" mövzusunda çıxış edən Fəxri Ağayev, tələbələrə öz şəxsi təcrübəsindən danışaraq karyera qurmaq istəyənlər üçün əhəmiyyətli məqamları vurğulayıb.

Fəxri Ağayev qeyd edib ki, uğurlu bir karyera qurmaq üçün yalnız ali təhsil kifayət etmir. Şəxsi keyfiyyətlər, sosial bacarıqlar, ünsiyyət və danışıq qabiliyyəti də böyük rol oynayır. Buna görə də, tələbələr təhsil həyatlarını səmərəli şəkildə dəyərləndirməli, öz üzərlərində daimi işləməli, xarici dil öyrənməli və mütaliəyə vaxt ayırmalıdırlar. Karyera yüksəlişini hədəf seçən şəxslər, ali təhsilini bitirdikdən sonra da öz bilik və bacarıqlarını inkişaf etdirməyə davam etməlidirlər.

Təlim iştirakçıların böyük marağına səbəb olub və tələbələr tərəfindən aktiv iştirakla keçirilib. Təlimin sonunda Fəxri Ağayev tələbələrin maraqlı suallarını cavablandıraraq, gələcəkdə karyera və peşəkar inkişafla bağlı tövsiyələrini daha da ətraflı şəkildə təqdim edib. Bu cür tədbirlər, Odlar Yurdu Universitetinin tələbələrinə peşəkar inkişaf və uğurlu karyera qurmaq üçün əvəzsiz imkanlar təqdim edir.