Xocalı Soyqırımının 28-ci ildönümü ilə bağlı tədbir keçirilib

Odlar Yurdu Universitetində Xocalı soyqırımının 28-ci ildönümü ilə əlaqədar bir tədbir təşkil olunub. Tədbirdə universitetin tələbə və müəllim heyəti, həmçinin İtaliyanın Link Campus Universitetinin Global və Beynəlxalq Direktoru Allesandra Liccardo və Link Campus Universitetinin direktor köməkçisi Roberto de Girolamo da iştirak edib.

Tədbir iştirakçıları əvvəlcə universitetin foyesində tələbələrin əl işlərindən ibarət olan “Xocalı bizi səsləyir” adlı rəsm sərgisi ilə tanış olublar. Bu sərgidə Xocalı soyqırımı qurbanlarına həsr olunmuş rəsmlər nümayiş etdirilib. Qonaqlara sərgi haqqında məlumat verilib və onların fikirlərinə görə, bu sərgi yalnız təsirli deyil, həm də sevindiricidir. Çünki gənclər vətənlərinə olan sevgisini və azadlıq uğrunda mübarizəsini bu şəkildə ifadə edirlər, həmçinin vətəndaşlıq borclarını başa düşərək, ölkələrinin qorunmasında fəal iştirak edirlər.

Akt zalında davam edən tədbirdə Xocalı soyqırımında qətlə yetirilmiş insanların və Vətən uğrunda canlarını fəda etmiş bütün şəhidlərin əziz xatirəsi bir dəqiqəlik sükutla yad edilib. Tədbirdə Xocalı faciəsi, ermənilərin Azərbaycan xalqına qarşı törətdikləri vəhşiliklər və Xocalı soyqırımının dünya ictimaiyyətinə tanıdılması haqqında ətraflı məlumat verilib. Xocalı haqqında həqiqətlərin dünya gündəmində yer alması, bu faciənin soyqırımı kimi tanınması məqsədilə Azərbaycan dövlətinin atdığı addımlar vurğulanıb. Xüsusilə, ümummilli lider Heydər Əliyevin təşəbbüsü ilə Xocalı soyqırımına siyasi-hüquqi qiymət verilməsi, fevralın 26-sının Xocalı Soyqırımı Günü elan edilməsi qeyd edilib. Hər il faciənin ildönümündə, həm Azərbaycanda, həm də dünya miqyasında, bu faciənin qurbanları yad edilir və ermənilərin törətdiyi cinayətlərə qarşı beynəlxalq ictimaiyyətə doğru məlumatlar verilir.

Tədbirin sonunda Odlar Yurdu Universiteti və Odlar Yurdu Kollecinin tələbələri tərəfindən “Kimdir müqəssir?” adlı tamaşa nümayiş etdirilib. Bu tamaşa, Xocalı soyqırımının və onun nəticələrinin əhəmiyyətini vurğulayan, eyni zamanda faciənin təsirini daha dərindən hiss etdirən bir təqdimat olub.